గ్రానైట్స్ కంపెనీల ఇష్టారాజ్యం.. అధికారుల మౌనం!

జాతీయ రహదారి పక్కనే గుంతలు.. రోడ్డుపై బండరాళ్లు!

గ్రామపంచాయతీ పాలకవర్గం,అధికారుల నిర్లక్ష్యంతో ప్రమాదాలకు ఆహ్వానం..

ప్రజల ప్రాణాలకు రక్షణ ఏది?

వెంకటేశ్వర,అరుణ గ్రానైట్స్ కంపెనీలపై చర్యలు తీసుకునేదెవరు?

ఉన్నతాధికారులు స్పందించాలని ప్రయాణికులు,స్థానికుల డిమాండ్

ఐనవోలు, అక్టోబర్ 10,తరంగాలు : ప్రజల ప్రాణాలకు రక్షణ కల్పించాల్సిన అధికారులు మౌనం వహిస్తే.. నిబంధనలు పాటించాల్సిన సంస్థలు ఇష్టారాజ్యంగా వ్యవహరిస్తే పరిస్థితి ఎలా ఉంటుందో హనుమకొండ జిల్లా అయినవోలు మండలం పంతిని గ్రామంలో కనిపిస్తున్న దృశ్యాలే నిదర్శనమని స్థానికులు ఆవేదన వ్యక్తం చేస్తున్నారు. వరంగల్‌–ఖమ్మం జాతీయ రహదారిని ఆనుకుని ఉన్న వెంకటేశ్వర, అరుణ గ్రానైట్స్‌ కంపెనీల సమీపంలో పెద్దపెద్ద గుంతలు, రోడ్డుపక్కనే పేరుకుపోయిన బండరాళ్లు వాహనదారులకు ప్రమాదకరంగా మారుతున్నాయని ఆరోపిస్తున్నారు.

*గుంతలు.. బండరాళ్లు.. నిత్యం ప్రమాద భయం!*

వరంగల్‌–ఖమ్మం జాతీయ రహదారిపై నిత్యం వందలాది వాహనాలు రాకపోకలు సాగిస్తుంటాయి. ఇలాంటి రద్దీ మార్గం పక్కనే పెద్దపెద్ద గుంతలు ఉండటం, భారీ బండరాళ్లు విచ్చలవిడిగా పడి ఉండటంతో వాహనదారులు తీవ్ర ఇబ్బందులు ఎదుర్కొంటున్నారని స్థానికులు చెబుతున్నారు. ఎదురుగా వచ్చే వాహనాన్ని తప్పించేందుకు ఒక్కసారిగా రోడ్డు పక్కకు వెళ్లాల్సి వస్తే గుంతల్లో పడటం లేదా బండరాళ్లను ఢీకొట్టడం వంటి ప్రమాదాలు జరిగే అవకాశం ఉందని ఆందోళన వ్యక్తం చేస్తున్నారు. ముఖ్యంగా ద్విచక్ర వాహనదారులు, రాత్రివేళ ప్రయాణించే వారు మరింత అప్రమత్తంగా ఉండాల్సిన పరిస్థితి నెలకొందని పేర్కొంటున్నారు.

*కంపెనీలకు ఇంత స్వేచ్ఛ ఎవరిచ్చారు?*

ప్రజల భద్రతకు ముప్పు కలిగించే పరిస్థితులు కనిపిస్తున్నా సంబంధిత గ్రానైట్స్‌ కంపెనీల యాజమాన్యాలు బాధ్యతాయుతంగా వ్యవహరిస్తున్నాయా? రహదారి పక్కన గుంతలు తవ్వడం, బండరాళ్లను నిల్వ చేయడం వల్ల ప్రజలకు ఎదురయ్యే ప్రమాదాలను నివారించేందుకు ఎలాంటి చర్యలు తీసుకుంటున్నారు? అనే ప్రశ్నలు స్థానికుల నుంచి వినిపిస్తున్నాయి. కంపెనీల కార్యకలాపాలపై పర్యవేక్షణ ఉండాల్సిన సమయంలో ఇలాంటి పరిస్థితులు కొనసాగుతుండటంపై వారు అసహనం వ్యక్తం చేస్తున్నారు.

*గ్రామపంచాయతీ పాలకవర్గం, అధికారుల మౌనం దేనికి సంకేతం?*

గ్రామంలో ప్రజలకు ఇబ్బందులు కలిగించే అంశాలను గుర్తించి సంబంధిత శాఖల దృష్టికి తీసుకెళ్లాల్సిన గ్రామపంచాయతీ పాలకవర్గం ఏం చేస్తోందన్న ప్రశ్నలు తలెత్తుతున్నాయి. అదే విధంగా ప్రమాదకర పరిస్థితులను పరిశీలించి అవసరమైన చర్యలు తీసుకోవాల్సిన సంబంధిత అధికారులు ఎందుకు స్పందించడం లేదని స్థానికులు నిలదీస్తున్నారు. కంపెనీల కార్యకలాపాలపై పర్యవేక్షణ ఉందా? రహదారి భద్రతకు సంబంధించిన నిబంధనలు పాటిస్తున్నారా? గుంతలు, బండరాళ్ల వల్ల ప్రమాదాలు జరగకుండా ఎలాంటి చర్యలు చేపట్టారు? అనే అంశాలపై అధికారులు స్పష్టత ఇవ్వాలని కోరుతున్నారు.
గ్రామపంచాయతీ పాలకవర్గం, సంబంధిత శాఖల అధికారులు సకాలంలో స్పందించకపోవడం వల్లే కంపెనీల యాజమాన్యాలు నిర్లక్ష్యంగా వ్యవహరిస్తున్నాయనే అభిప్రాయాన్ని స్థానికులు వ్యక్తం చేస్తున్నారు. అయితే ఈ ఆరోపణలపై సంబంధిత అధికారులు విచారణ జరిపి వాస్తవాలను వెల్లడించాల్సిన అవసరం ఉంది.

*ప్రమాదం జరిగిన తర్వాత మేల్కొంటే ప్రయోజనమేమిటి?*

ప్రజల ప్రాణాలకు ముప్పు పొంచి ఉందని ఆందోళన వ్యక్తమవుతున్న నేపథ్యంలో ఏదైనా ప్రమాదం జరిగిన తర్వాత స్పందించడం కంటే ముందుగానే చర్యలు తీసుకోవడం ముఖ్యమని స్థానికులు సూచిస్తున్నారు. జాతీయ రహదారి పక్కన ఉన్న గుంతలను పూడ్చివేయడం, బండరాళ్లను సురక్షిత ప్రాంతానికి తరలించడం, అవసరమైన హెచ్చరిక బోర్డులు ఏర్పాటు చేయడం వంటి చర్యలు చేపట్టాలని కోరుతున్నారు.
జిల్లా ఉన్నతాధికారులు, సంబంధిత శాఖల అధికారులు తక్షణమే క్షేత్రస్థాయిలో పరిశీలన జరిపి, నిబంధనల ఉల్లంఘనలు ఉన్నట్లు తేలితే వెంకటేశ్వర, అరుణ గ్రానైట్స్‌ కంపెనీలపై చట్టప్రకారం చర్యలు తీసుకోవాలని స్థానికులు డిమాండ్ చేస్తున్నారు. గ్రామపంచాయతీ పాలకవర్గం కూడా తన బాధ్యతను గుర్తించి ప్రజల భద్రతకు ప్రాధాన్యం ఇవ్వాలని కోరుతున్నారు.
ప్రజల ప్రాణాల కంటే కంపెనీల ప్రయోజనాలే ముఖ్యమా? అన్న ప్రశ్నకు సంబంధిత అధికారులు సమాధానం చెప్పాల్సిన సమయం ఆసన్నమైందని వాహనదారులు,గ్రామస్తులు పేర్కొంటున్నారు.