ఆడపడుచుల ఆనందమే బతుకమ్మ పండుగ పరమార్థం!

ఆడపడుచుల జీవితాల్లో ఆనందాల పూలవాన కురవాలి!

వర్ధన్నపేట నియోజకవర్గ ప్రజలకు ఎంగిలిపూల బతుకమ్మ శుభాకాంక్షలు

తెలంగాణ సంస్కృతి, సంప్రదాయాలకు బతుకమ్మ పండుగ ప్రతీక

ఆడపడుచులందరూ భక్తిశ్రద్ధలతో, ఆనందోత్సవాల మధ్య పండుగను జరుపుకోవాలి: వర్ధన్నపేట ఎమ్మెల్యే కేఆర్ నాగరాజు

వర్ధన్నపేట ప్రతినిధి, అక్టోబర్ 10,తరంగాలు : తెలంగాణ ఆడపడుచుల ఆత్మీయతకు, ఆత్మగౌరవానికి, ప్రకృతితో మమేకమైన సంస్కృతి సంప్రదాయాలకు ప్రతీకగా నిలిచే బతుకమ్మ పండుగను ప్రతి ఒక్కరూ సంతోషంగా జరుపుకోవాలని వర్ధన్నపేట ఎమ్మెల్యే కేఆర్ నాగరాజు ఆకాంక్షించారు. ఎంగిలిపూల బతుకమ్మ పండుగను పురస్కరించుకుని వర్ధన్నపేట నియోజకవర్గ ప్రజలకు, ముఖ్యంగా ఆడపడుచులందరికీ ఆయన హృదయపూర్వక శుభాకాంక్షలు తెలిపారు.
తెలంగాణ సంస్కృతిలో బతుకమ్మకు ప్రత్యేకమైన స్థానం ఉందని, రంగురంగుల పూలతో బతుకమ్మలను పేర్చి, పాటలు పాడుతూ, ఆటపాటలతో జరుపుకునే ఈ పండుగ మన ఆడపడుచుల ఐక్యతకు, కుటుంబ అనుబంధాలకు, ప్రకృతి ప్రేమకు ప్రతీకగా నిలుస్తుందని పేర్కొన్నారు. తరతరాలుగా వస్తున్న ఈ సంప్రదాయం తెలంగాణ ఆడబిడ్డల జీవనశైలిలో అంతర్భాగమైందని తెలిపారు.

*ప్రతి ఆడబిడ్డ ముఖంలో చిరునవ్వు విరియాలి.. ప్రతి ఇంటా సంతోషం వెల్లివిరియాలి!*

బతుకమ్మ పండుగ అంటే కేవలం పూలను పేర్చి ఆడుకునే వేడుక మాత్రమే కాదని, ఆడపడుచుల ఆత్మీయతను, ఆప్యాయతను, కుటుంబ బంధాలను మరింత బలోపేతం చేసే అపురూపమైన పండుగ అని ఎమ్మెల్యే కేఆర్ నాగరాజు పేర్కొన్నారు. పుట్టింటి జ్ఞాపకాలను, అక్కాచెల్లెళ్ల అనుబంధాలను, చిన్ననాటి మధుర స్మృతులను గుర్తుచేసే బతుకమ్మ ప్రతి మహిళ హృదయంలో ప్రత్యేకమైన స్థానాన్ని సంపాదించుకుందని తెలిపారు.
ఎంగిలిపూల బతుకమ్మతో ప్రారంభమయ్యే ఈ పూల పండుగ తొమ్మిది రోజులపాటు తెలంగాణ ఆడపడుచుల ఇళ్లలోనూ, వీధుల్లోనూ సందడి నింపుతుందని, ప్రకృతి ప్రసాదించిన పూలతో బతుకమ్మలను అందంగా అలంకరించి భక్తిశ్రద్ధలతో పూజించడం మన సంస్కృతిలోని గొప్పదనాన్ని చాటుతుందని అన్నారు.
వర్ధన్నపేట నియోజకవర్గంలోని ప్రతి గ్రామంలో బతుకమ్మ సంబరాలు ఆనందోత్సాహాలతో జరగాలని, ఆడపడుచులందరూ ఆయురారోగ్యాలతో, సుఖసంతోషాలతో వర్ధిల్లాలని ఆయన ఆకాంక్షించారు. ప్రతి కుటుంబంలో సిరిసంపదలు వెల్లివిరియాలని, పాడిపంటలతో తెలంగాణ నేల పచ్చగా కళకళలాడాలని, ప్రజల జీవితాల్లో సుఖశాంతులు నిండాలని కోరుకుంటూ మరోసారి నియోజకవర్గ ప్రజలందరికీ ఎంగిలిపూల బతుకమ్మ శుభాకాంక్షలు తెలిపారు.